إحنا مين ؟! - الرعيل الأول

الرعيل الأول .. الآباء المؤسسون .. العواميد اللي شالت الراديو لغاية ما قام و صلب طوله و بقى إذاعة قد الدنيا ليها جمهورها اللي بيستناها و بيستنى اللي حتقوله .. 

 

مين بقى ؟!

قائد الكتيبة و العقل المدبر و زعيم التنظيم العصابي المؤسس لهذا الراديو الثوري .. درس فنون الإعداد الإذاعي في كهوف تيت راديو، و قرر في لحظة طيش أعمى إنه ينقل الخبرة دي لمجموعة من القطط المغمضة - اللي هما إحنا - و نعمل الراديو البريء ده ..
محمد له تاريخ إذاعي طويل في تيت راديو، و قبلها في إذاعة المدرسة و مسابقات الإلقاء، و اللي ما يعرفش محمد رمضان من تيت راديو، ممكن يعرفه من هنا، بس اللي ما يعرفوش .. أكيد خسر كتير :)

متعهد الاكتفاء الذاتي من الأغذية، و مسؤول الكانتين، و مورد التفاؤل لفريق الراديو .. درس مهارات التنظيم و نشر الديمقراطية في الأردن الشقيق، و هو عضو فاعل في حزب الجبهة الديمقراطية، و بكده يبقى عمل لنا اكتفاء ذاتي من التمويل الأجنبي، و الأجندات الخارجية كمان، و عن حد ما خلّى في نفسه حاجة :)
كريم أول بني آدم في مصر يقرر طواعية يكون بصمجي، و دا لأنه اكتشف سر خطير في عالم البصمجية .. اسمعوه و أنتوا تعرفوا..   

أسامة جدًا و إسماعيل قوي، و أي حد ممكن يقول الكلام ده بقلب مطمئن .. أسامة من الكتيبة المناضلة اللي على جبهة البكالوريوس، و كلها سنة و يبقى ضاكتور قد الدنيا، و يبدأ يتاجر في الأعضاء و يعمل عمليات إجهاض براحته، و دا ببساطة لأن الدنيا مولد في الميري .. مولد إزاي ؟ أسامة يجاوبكم أحسن مني ..

أسماء بتمثل حالة فريدة من نوعها في الكتابة .. ممكن تقول إن كلامها العادي بيطلع في شكل قصة قصيرة و سكريبتات إذاعية، و من الصعب تلجأ لها و ما تساعدكش، دا إن لم تتولى هي المهمة كاملة و تطلع لك حاجة أوستيك كده على سنجة عشرة .. حتلاقوا لمسة أسماء في معظم برامجنا، و مش من الصعب إنكم تلقطوها، و الأكيد - في كل الأحوال - إنكم حتستمتعم باللمسة دي جدًا ..

نورا كان نفسها تشتغل مذيعة بس جابت مجموع كبير فما عرفتش تخش إعلام، و ما صدقت لقيت الفرصة في الراديو ده .. نورا قررت في الراديو ده تلتحم بطبقات الشعب العامل و تنزل الشارع تقول لنا إيه اللي بيحصل على الأرض، و تجيب الديب من ديله و تسمعنا بيقول إيه .. تقريبًا كده، ممكن تقولوا إنها المراسل الحربي بتاعنا :)

مسؤول المسخرة و سفير الإله بس عندنا في الراديو .. أي هلس في أي حتة هو أكيد له يد فيه، و أي لبش يحصل لازم تدور فيه على عبدالهادي .. 
أحمد محرر إذاعي و مذيع مغمور و صاحب راديو ع النت على قد حاله عدد مستمعيه لا يتعدى عدد أفراد أسرته، و يمكن شوية من أصدقاؤه كمان، و بيحاول يركب على كتاف الراديو عشان يتشهر، بس الواد ييجي منه، و كلامه يتسمع، رغم إنه ممكن يعجبك و ممكن لأ، و الحكم في النهاية ليك أنت ..

مسؤول الدراسات الاستراتيجية المتعلقة بالكيان الصهيوني، و هو نفسه كان جلدة موسوعة اليهود و اليهودية للمسيري بس هرب من المطبعة، و مصنف عالميًا كأكبر عدو للسامية في منطقته (زعربانة غرب)، و رغم إنه مؤمن إن فكرة العداء للسامية من أغبى الأفكار  اللي انتجتها البشرية، إلا إنه سعيد بالتهمة، و حيحاول يعرفنا ليه إحنا كمان لازم نسعى لتهمة زي دي ..

ندى سيطر عليها بعد الثورة هاجس شغل كل تفكيرها، و هي إنها تعمل حوار مع الراجل اللي ورا عمر سليمان، و قعدت ما يقرب من شهرين بتحاول توصل له، لكنها فشلت فشل ذريع في الحكاية دي، رغم نجاحها في الوصول للراجل اللي ورا الراجل اللي ورا عمر سليمان .. ندى حتكون ضمن فريق المراسلين بتاعنا، بس أهم حاجة و هي بتعمل حوار معاك، إنك تتأكد إن ما حدش واقف وراك :)

الطفل المعجزة و سفير المسخرة التاني مع أحمد عبدالهادي، و مصدر السعادة و البهجة في كل اجتماعاتنا .. برضو من الكتيبة المناضلة على جبهة البكالوريوس و دراع البلاي ستيشن التاني في المولد المقام على أرض الميري، و اللي حيساهم فيه بدور كبير مع أسامة إسماعيل .. إزاي بقى، دا تعرفوه منه هو ..

المتطوعة باستمرار و إخلاص في كافة أنشطة اللجنة الثقافية .. نرمين كان نفسها تبقى مراسلة في دارفور أيام الأزمة الشهيرة، لكن لقت إن كله ضرب ضرب، و مفيش شتيمة، و الدنيا حر، و عرق و ملاريا و بتاع، فتراجعت عن الموضوع، و قررت إنها تنزل في ميري إف إم مراسل حربي على ما قُسم ضمن فريق المراسلين بتاعنا ..

نورهان بتحب تطبخ، و تعشق برامج الطبيخ، و خصوصًا المداخلات الهاتفية، و كان حلم عمرها تعمل مداخلة في برنامج الشيف أسامة أو الشيف الشربيني، بس الفرصة لم تتح لها قط - أبدًا يعني :) - و لذلك قررت إنها تعمل من أجل أصحاب المداخلات المظلومين اللي ما حدش بيسمع لهم و دايمًا يقفلوا عليهم في الكنترول، و تقدم باسمهم برنامج اتكلموا اللي حتسيبهم يرغوا فيه حبة من نفسهم .. اتكلموا بقى ما لكمش حجة ..

المنسق و المنظّر السياسي الخاص بالراديو .. بيقول كلام كبير و مجعلص ما تعرفش أوله من آخره، بس من رحمة ربنا بينا إنه بيعرف يختصره و يبسطه .. حتسمعوا أحمد بيتكلم عن السياسة في شغل سيس، بس مش أي سياسة :)

مما لا شك فيه إن فدوى لو أتيح ليها الفرصة حتتحول لشريط فيديو أو بكرة سينما، و دا مش بعيد كتير عن وضعها الحالي .. فدوى مدمنة أفلام لدرجة إن كلامها بقى ينزل له subtitles تحتيه :) .. و هو ده اللي حتقدمه فدوى في الراديو؛ رحلة في السينما يمين و شمال تطلع بينا بيها برة صندوق الواقع المرير و برة صندوق الكلية الأكثر مرارًا، و تسرح بينا شوية في عوالم تانية، أرحب و أوسع ..

اسم على مسمى، و رافع راسنا في أي حتة، دا غير إنه مدّي هيبة للراديو .. أحمد بيلقط الخبر من بعيد - و السبب واضح طبعًا - و دا أهلّه إنه يشتغل في نشرة الأخبار؛ يلقط الخبر و يذيعه .. مهما كان الخبر بعيد، ثق إنك حتلاقيه عندنا :)

رودينا مؤمنة إن الواقع هو أسوأ كابوس ممكن تعيشه، و إنك عشان تطلع منه سليم - لا ميت و لا زومبي - فأفضل حل إنك تحلم و تحلم و تحقق اللي بتحلم بيه .. رودينا بتتعبنا في كتابة اسمها، هل هو رودينا و لا رودينة و لا رُديْنا، بس رغم الكعبلة دي، إلا إن رودينا نفسها أبسط من كده بكتير، و بساطتها دي هي اللي خلتها رغم سنين الحرب المتصلة في معترك كليتنا لسه قادرة تحلم، و مؤمنة إننا إحنا كمان لسه قادرين نحلم ..

ذو الوجه الطفولي و القطة المغمضة اللي الثورة أفسدت أخلاقه، و بقى مهتم بالسياسة و الشأن العام المصري .. محمد من مواليد دمنهور الساعة 6 الصبح، و دا خلاه الوحيد الفايق فينا، لأنه الوحيد من بينّا اللي افتكر إننا دكاترة، و قرر يعمل برنامج يعالج فيه مرضى الميري، في أول تجربة علاج لاسلكي في التاريخ، و هو دا الجديد من ميري إف إم :) 

جندي مجمد عبدالرحمن الجندي .. من الصعب تحط الجندي في مكان و ما يشتغلش، و لو ما لاقاش أي حاجة يشتغلها بيشتغل نفسه .. عبدالرحمن حيكون مذيع النشرة الجوية بتاعنا، اللي حيقول لنا الجو في الكلية عامل إزاي؛ حيقول لنا مين حيعمل إيه إمتى و فين جوه الكلية، من أول الدعاسيق اللي ملت الكلية لغاية العميد، و حيكون ودنك اللي حتنقل لك كل كبيرة و صغيرة بتحصل جوة الكلية ..

الحاجة اللي ناس كتير ما تعرفهاش إن فكرة الفواصل الإعلانية في البرامج و المسلسلات هي أصلاً فكرة نبيلة، بس ما عرفتش تسوقها كويس و اتسرقت منها - كان زمانها دلوقتي مليارديرة :) .. نبيلة قررت الانتقام من كل المحطات و القنوات الإذاعية و التلفزيونية بإنها تحرمها من موهبتها الجبارة و تشترك في ميري إف إم كمذيعة في نشرتنا الإخبارية "هات ودنك"، و توريهم هم خسروا قد إيه .. استنوها ..

إذا ذُكر عبدالرحمن يحيى ذُكرت جدعنة أهل محرم بك .. عبدالرحمن شاعر من أصحاب المعلقات رغم إنكاره المستمر للحقيقة الكونية دي .. رغم إنه من الفريق المؤسس للراديو، إلا إنه حتى الآن مش معروف هو بيعمل إيه بالظبط، لكنك بسهولة حتكتشف إنه موجود في كل حتة في الراديو، من أول اختيار اللوجو و السلوجان، لغاية الشششششش اللي في آخر الإرسال .. 

الشهير بعبود بن دردير، و هو أحد زعماء قبائل الطوارق في الجزائر، و جالنا إعارة يعمل لنا شوية شغل و يرجع تاني، و احتمال يكمل معانا و يستقر في مصر .. عبود كائن صامت عايش معظم حياته على الفيبريشن، و دا اللي خلاه ما يشتركش في البث الإذاعي معانا، باعتبار إننا لسه ما عندناش برنامج بيتكلم بلغة الإشارة أو بلغة الجسد .. لكن رغم كده فهو بيعتبر إن لغته تتلخص في الكلام اللي بيكتبه (زي الكلمتين اللي أنت بتقرا فيهم دول) و التصميمات اللي متنطورة يمين و شمال في الموقع و في غيره ..